總費用 TOTAL = $9028
路票: $510
學牌: $548
考試租車: $1600
學車: $2450 (鏗鏘10課節/每課45mins) + 散鐘 $280x14課節 = $6370
考完可以簽返私家車棍波(1)+輕型貨車(2)!
報名&排期
2020.09.22 (Tue)
報名考中型貨車! 5月過咗3年牌, 到9月尾先去報, 因為考中型就可以解鎖私家車自動波同加簽埋輕型貨車, 又唔洗排輕貨貨車條隊咁耐。係荃灣成日見大車學車, 結果就揀咗鏗鏘（報埋大巴）。
2020.10.18 (Sun)
鏗鏘打嚟話我知中型貨車考期出咗, 係2020年12月30號, 姐係2個月多少少咋。
2020.10.27 (Tue)
關師傅打比我叫我準備學車, 就約佢星期四朝早啦。
學車
2020.10.29 (Thu) 10:30-12:00 [1&2]
第一次學車, 師傅教咗我棍波同極力子基本技巧, 就叫我練習下轉波(上波落波)(拉咗手掣原地練習下手腳協調)。練咗15分鐘原地轉波師傅就帶我係荃灣(青衣北橋後面同地鐡橋果段落)練習開車轉波停車, 不斷係條路到來回來回, 好彩只係死咗火幾次。練練下其中一個掘頭路小型迴旋處啲大車停晒係度, 第一堂就要做調頭, 原來大車真係好多死位睇唔到架。最後師傅比我揸出去荃灣公園後面避車處, 好彩幾個紅綠燈都順利開停, 臨落車師傅都讚我揸得幾好, 自動波上嚟算係適應得好快!
2020.11.14 (Sat) 13:30-15:00 [3&4]
上次揸完隔咗成兩個星期以為自己會唔記得會好混亂, 點知一上車師傅就叫我揸上大窩口行下條路線（心諗：下！上次學完開停轉波咋喎）。
行完大窩口
師傅：記唔記得呢條路線
我：記唔到喎第一次行
師傅：下! 我記錯咗咩, 以為上次行過啲路線
我：上次學咗開停咋嘛
師傅：唔緊要啦, 揸得幾好呀, 咁我地行埋另外果兩條路線啦
呢次行過晒啲路線一次, 永基路同永建路好短好易記，但大窩口線真係有啲難記。仲要每條線嘅必經之路係荃灣德士古道迴旋處(3線嘅細迴旋處), 超多車勁難出, 聽講有好多人都因為體驗過呢個迴旋處就轉考柴灣, 希望我可以挑戰成功!
2020.11.22 (Sun) 12:00-13:30 [5&6]
行咗一次大窩口終於有啲印象。 師傅帶咗我去葵涌(青衣南橋橋底)果邊泊位調頭, 泊位係S位, 比起私家車自動波泊S位真係難好多, 要打燈、望鏡、入波、吊極力子、睇位..., 個位入咗去真係冇咩位淨, 但仲要車尾泥擋啱啱入黃格。吊極力子慢車真係難度嘅挑戰, 仲有呢架車個軚每邊有三圈, 有時轉到都唔知轉咗幾多個圈, 要回幾多圈先直車! 雖然泊咗幾次調咗幾次頭, 又泊到又調到, 但其實腦海都係一片空白, 師傅講一樣做一樣。
2020.11.25 (Wed) 19:00-20:30 [7&8]
再行多一次啲路線, 差唔多記得晒啲路口架啦! 師傅話夜晚睇位好難睇所以今日就唔做泊位調頭啦淨係操3條路線。大窩口、永基路、永建路、大窩口、永基路、永建路、永基路、永建路。咁操路線法想唔記得都難。
2020.12.26 (Sat) 10:30-12:00 [9&10]
呢幾個星期好忐忑究竟我12月30號洗唔洗考車, 因為12月2號宣布咗停考車, 停到16號之後就再話停到直至另行通知, 所以都係學多一次先, 以防萬一真係30號考得(雖然機會好微乎其微但都要預備下)。今次大窩口、泊位2次、調頭2次(返屋係沉澱下真係好好多, 起碼唔洗逐下逐下師傅講先識做)、永建路、永基路、永建路、永基路(師傅話好多時都考永基永建呢兩條因為短啲, 少啲考大窩口因為差唔多長成10分鐘)
2020.12.28 (Mon)
終於係Google Map畫返啲考線路線出嚟。
路線: 永基路/ 永建路/ 大窩口
2020.12.30 (Wed) 14:30
考試因為第四波疫情取消咗......唯有等運輸處通知下次考期係幾時啦
2021.02.21 (Sun)
開信箱, 終於見到考試排期信, 一個月後23/3就考啦
2021.03.01 (Mon) 19:00-20:30 [11&12]
兩個月冇學車, 一上車好迷惘
2021.03.08 (Mon) 19:00-20:30 [13&14]
2021.03.14 (Sun) 10:30-12:00 [15&16]
係咪仲未有人學車, 完全冇人泊位調頭, 可以係咁練
2021.03.17 (Wed) 19:00-20:30 [17&18]
2021.03.21 (Sun) 16:30-18:00 [19&20]
死啦好似仲係好唔熟咁特別係泊位調頭, 有時斜路開車又會溜後咁。
2021.03.22 (Mon) 20:30-22:00 [21&22]
經過琴晚同今朝寫完一次考試流程, 再不斷係腦入面諗點做泊位調頭同轉波停車轉停繼續行。今日上車行完一轉大窩口再入去泊位調頭, 係咪太夜又係冇人泊位調頭, 做咗6-7次, 師傅都話好穩定咗, 好咗, 即刻信心大好多, 臨尾再行轉永基路。
2021.03.23 (Tue)
11:00
去咗考場側邊個停車場睇人考車, 11:30呢轉2個泊位已經fail, 2個泊位調頭出咗街其中1個返嚟係fail, 嘩乜咁多fail架
12:00-13:45 [23&24]
考前最後衝次!!! 太多人排隊, 只係做咗兩次泊位調頭。行咗幾次永基路永建路, 平日條路又多行緊嘅車又多死車, 入德士古道迴旋處都好難入。13:50就入試場準備考車
13:55
報到完就等嗌名, 14:00呢轉第一個泊位調頭出到街, 第二個泊位就fail, 第三個泊位調頭出到街。
第四個就嗌我名啦, 先交身份証車牌比考官對資料, 然後就讀車牌, 之後上車考3題口試。夠慢, 泊位搞掂, 調頭搞掂, 但有啲緊張吊極力子吊到我腳震。出得街, 門口轉左燈口轉左, 姐係永基永建路。頭段好順暢, 去到上永基路, 嘩考車先嚟咁多車, 玩咩, 又兩邊死車, 上上下斜路對路車行晒中間, 唯有即刻停車, 停到終於冇車落嚟先斜路開車繼續上, 上到去再做斜路停車開車, 冇溜後搞掂。繼續行double park晒啲車, 瘋狂打燈望鏡另頭, woo過咗, 最後難關係德士古道迴旋處, 勁多車勁快, 踩咗成分鐘極力子先入到迴旋處, 臨出又有車係後面衝上嚟, 要兜多個圈先出到, 正, 返考場啦, 停車熄匙入一波, 搞掂落車。
隔咗一陣就嗌名攞成績單, 1 take pass呀哈哈哈, 師傅都好開心。第二個1 take pass呀 (自動波私家車+棍波中型貨車)
Comments